2Ti 3 | PONPDN | STEP | A IET me koe en asa, ni imwi en ran akan ansau apwal pan pwaida.

2 Timothy 3

1 A IET me koe en asa, ni imwi en ran akan ansau apwal pan pwaida. 2 Pwe aramas akan pan kasampwaleki pein irail, o norok moni, o ponmasu, o aklapalap, o lalaue, o sota peiki on me wia ir adar, o so danke, o me sued. 3 O sempok, o sasa mak, o likinekine, o weit, o so kadek, so pok on me mau kan, 4 O me kin panala me saraui, o me katil la, o kala, o inon ion 5 Me sansalki lelapok ap sasa a manaman; muei wei san mepukat. 6 Pwe akai irail kin wailon on nan im akan o kaloedi li akai, me toutouki dip, o me inon sued kin kaua ir sili. 7 Me kin sukusukul ansau karos, ap sota lolekon kila melel. 8 A duen Ianes o Iampres palian Moses, iduen mepukat kin palian melel, i son en aramas akan me suedelar ni lol arail, o me sota mau on poson. 9 A re sota pan pwaida, pwe ar lolepon pan sansal on karos dueta a wiauier ren irail. 10 A koe ala san ai padak o ai tiak, o ai lamalam o poson, o dadaurata, o limpok, o kanonama, 11 O kamakam akan, o kalokolok kan, me lel on ia nan Antiokien, o Ikonien, o Listra; son en kalokolok toto, me lel on ia. A Kaun o kotin dore ia lar san ir karos. 12 A karos me men dadaurata duen me kon on Kot ren Kristus Iesus, pan kamekameki. 13 A aramas sued o malaun akan pan kakairida ni ar sued, irail pan kotaue aramas akan o re pan kotaue irail. 14 A koe dadaurata, me koe padakkier pwe koe asaer, me koe padakki san er. 15 O koe asa kisin likau saraui kan san ni om seri, me kak kalolekoni uk on maur potopot ki poson me mi ren Kristus Iesus. 16 Pwe masan en kisin likau kan karos tapi san ren Nen en Kot, me mau on padak, o kapun, o kamau, o kainene on me pun. 17 Pwe aramas en Kot en unsokela o koiok on wiawia mau karos.